søndag 11. september 2016

Velkomen september

med ein vakker solnedgang. 
Hausten er ei fin tid med klar luft og nydelege fargar i naturen.




Bilete er tatt frå trappa mi. Vi ser Breisundet og havet.
Denne helga har vi hatt god hjelp frå familie 
og vener til sauesanking. 
Alle 35 sauene vi sendte til fjells i juni 
beitar no på innmarksbeitet på tunet.
Igjen kan vi høyre sauebjellene. 

Det er så godt å få dei heim att.
No startar den tunge jobben med å velje kven som skal få bli 
og kven som skal bli slakt. 
Det er faktisk første gang vi gjer.

Ynskjer deg ein fin haustkveld.

Irma

mandag 29. august 2016

Det var ein gong ein

gamal sommarfjøs......






Oktober 2014 sette vi inn ei dør og laga større opning på eine kortveggen. Sommarfjøsen har i to år vore først og fremst vore fòringsstad  og ly for ti søyer. 
Den har gjort nytte for seg desse to åra og mange fleire år før det.

No er fjøsen jamna med jorda for å gjere plass til ein ny sommarfjøs. Om to veker skal vi hente sauene ned frå fjellet og nyefjøsen skal verte ny fòringstad og ly. 

Irma


lørdag 27. august 2016

Hønsegard

Etter fleire klekkingar i vår vart resultatet 22 høner og hanar. Kven som er hane og høne kan nok ein røynd hønsebonde sjå, men oss er ikkje heilt sikker. 
Det vart bygd ny hønsegard i juli. Kyllingane har hatt god plass her. Hønsehuset som skal huse dei i vinter er ikkje bygd, men denne årstida greier dei seg med kun hønsegard. 
Vi har bygd opp vagler av drivved. Det ser ut som dei trivs og har det bra. Dei eldste er nok verpeklare om nokre veker.
Vi gler oss til heimelaga egg :-)





Verpekasse er ein gamal kommode. 
Blir spennande å sjå om dei syns den er bra nok.

Ynskjer alle ein god laurdagskveld.

Irma



mandag 15. august 2016

Eit kvalpeliv

Kvalpane som vart fødde 27.mai vart leverte 22. og 23.juli.

Seks små eurasierkvalpar har vakse seg store. 

Dei har flytta til nye heimar.Vi har allereide besøkt halvparten av flokken og det har vore hjartelege gjensyn.





Det har vore ei travel, fantastisk og god kvalpetid. 

No er kvardagen tilbake og 

Lerke er igjen dronninga i flokken i Nilsgarden. 


Irma




søndag 14. august 2016

torsdag 11. august 2016

Juli kom og for.....

Det har vore ferie i juli, 
men når vi ser tilbake gjekk månaden skrekkeleg fort 
og det vart ikkje tid til meir enn eitt blogginnlegg. Merkeleg.

Sidan det vart slik det vart må det bli eit lite tilbakeblikk:

* Drengen har grove ut og steinlagt ei kokegrop.
Denne skal brukast til steiking av kjøtt og fisk.

Eit lammelår på 3,5 kg vart prøvd ut først.



2,5 time seinare.

Grønsakene vart pakka inn i aluminiumsfolie 
og lagt på ei helle høgare oppe i kokegropa. 

Når kokegropa vart opna, la kokken lammesteika til sides for å kvile. Grønsakene var møyre og smakfulle.

Det smakte nydeleg. 


Ynskjer deg ein nydeleg kveld.
Hugs å lage deg ein god dag i morgon.
 *
Irma 
*











mandag 11. juli 2016

Første jordbær i år...

og den frå eigen jordbæråker. 
Jordbæra smakte søtt 
og vart delt i to slik at drengen fekk ein smakebit. 
Det er elles tid for både luking inn i mellom bringebærbusker 
og plenslått. 
Kjekt sommararbeid, 
men litt meir tiltak når skodda heng i halskragen og det yrar.





Sidan sist har vi fått flytta på plass "huset mitt" 
som eldste barnebarnet vår, Jenny seier. 
Det er ei gulmåla leikarhytte som vart med på flyttelasset i vinter. Den har stått i le for vind 
og vèr ved løda i påvente av eit fundament å sette henne på. 
No er fundament for både leikarhytte 
og hønsehuset støypt og tørka.
Leikarhytta er trygt plassert. 
No er det kun ein rundvask att 
og vips så kan den fyllast med leik 
og moro igjen. 
Til glede for to små besteforeldregoll.



Det trengs både blomster og stæsj her, 
men først må det kome hèller på taket.


KLEM IRMA





søndag 26. juni 2016

Ein lukkeleg dreng

som hadde omtrent alt gardsutstyret klart til slåtten. 
Det siste som er kome på plass i tunet er ein høyvendar. 
Den kom godt med i slåtten i lag med ein sidevendar.




Ynskjer deg ein god søndagskveld!


KLEM IRMA


mandag 20. juni 2016

Ein liten sommarfest for gode naboar

 Søndag ettermiddag var små og store naboar samla i Nilsgarden.
Nokre var forhindra å kome, men på andre forsøket greidde vi å samle naboar frå fleirtalet av dei sju husa på Melbøen.
Sola skein, men ein kald nordavind gjorde til at vi satt inne. 
Kjekt å møtast slik og dele kvardagstankar.
Kvardagane går så fort og det blir altfor for lita tid til å ha kontakt med dei nærmaste naboane rundt oss. 





Ein nabo har eg, to og tre,
ja faktisk enda fleire med!

Nokon ser kvar steg eg går,
tek nummer på kvar bil som står
i vegen for at dei får sjå
mitt ugras som i fred får stå.
Men heilt ok og greit for meg,
ein tjuv ville nok angra seg!

Ein nabo har ein utestamp,
ein annan har ein liten ramp...
Så er det ein som vaskar bil,
mens andre heller tek ein kvil
og gløymer setja fram sitt boss,
nei oops, det var visst jammen oss...

Og ned ei trapp og inn ei dør
sitt naboar med godt humør,
som me er veldig glade i,
dei stiller opp når dei har tid!
trass varsel kort, dei sjeldan grin,
så: kan de passa vår kanin???

Kristin S. Audestad



Er det lenge sidan du snakka med naboane dine?
Send ein invitasjon i dag. 
Ein treng ikkje stresse rundt 
og ta det så høgtidleg om ein inviterer på kaffi.



Ynskjer deg ei fin juniveke.



.

søndag 19. juni 2016

Eit bruktfunn.....

som eg har vore på utkik etter lenge. Veldig lenge faktisk.

Eit dekketøyskap!





Det passa akkurat der eg hadde tenkt det skulle stå på kjøkkenet.
Det er så kjekt når ein finn slike fine skattar.






lørdag 18. juni 2016

På tur med beitesaks og sag

Fjorden langt der nede. Kratt og renningar er klipt vekk.


 Fossen frå Ædhaugen. Ein nydeleg sommardag.


Vi skimtar Molladalstindane. 
Vi sjekkar kjettingen om den er trygg og korleis den må forlengast.


Molladalen mot Molladalsskaret og vatnet.
Mykje snø vi fjella enda.


Ein flott dag for dugnadsarbeid.

Ynskjer alle ein roleg laurdagskveld.






tirsdag 7. juni 2016

Sommarvarme

Vi har dyrka utelivet sidan siste innlegg. 
Det har vore strålande sol og temperaturar rundt 20 grader. Det har vore heilt fantastisk. Bålpanna har vore flittig i bruk og det har vore eit aktivt uteliv i hage og tun. Vi har planta, klipt og luka. Rhododendron, plomme- og kirsebærtrea blomstrar. 

*

Vi har opna padlesesongen i finevèret! 
På grunn av husbygging i fjor vart det lite padling, men
i år har vi fleire turar vi ynskjer å gjennomføre. 

*

Kyllingane er 3,5 veker. Dei fekk ny hønsegard i fjøsen i helga. 
No har dei god plass i påvente av utandørs hønsegard.


*


I tillegg har hunden vår Lerke fått seks nydelege kvalpar. Ho passar på dei som berre ei mor kan gjere. Sleiking og snusing. 
Ho har knapt tid til å gå ut i nødvendige ærend. Ho har fått det framtidige badet som kvalperom og der har dei det roleg og godt. 
Kvalpane er no 11 dagar. Dei veks og ser sunne og friske ut. 
Alle har nye heimar å flytte til om 6,5 veker.  





*

Sauene og lamma har gått nokre veker fram i Nilsøyane. Etter ei veke tok vi dei ned til garden att for å klippe dei. Det var ein varm dag å gjere slikt arbeid, men det verka som sauene syns det var godt å få av seg vinterulla. Alle tretten søyene vart klipt på ein dag. Det kunne vi kjenne i kroppen dagen etter...... Lamma veks og trivs. Vi vog flaskelammet berre for å sjå om det er tid for avvenning og då viste vekta 17,5 kg. Det nærmar seg snart fjellbeiteslepp.






*

Ynskjer alle ein fin sommardag!






mandag 23. mai 2016

Kjøkkenhyller

Eg har vore på leit ei stund etter småhyller, 
kommodar og skap til oppbevaring.

No har vi budd i Nilsgarden i snart fem månadar og 
vi ser litt kva som manglar her og der. 
Helst skal det vere noko praktisk og gjerne
at det ser ut som det alltid har stått i huset. 

Litt nytt, gamalt, moderne og slite. 
Heimen skal både minne oss om  ei tid som var og er.  



Dette er ei Ikeahylle. 
Har vore ei stund på jakt etter ei hylle til 
dei kvite krydderskålene eg har arva frå svigermor. 
Ei ny og moderne hylle til ein brun tømmervegg.
Kontrast, men det er slik eg likar det. 
Kverna frå onkel Jos (onkelen til far min), 
 foreldra mine fekk då han flytta på aldersheim.

Ei gamal skuffe har vorte hylle til kokebøkene.
Skuffa har vi tatt til sides frå ei gamal kjøkkeninnredning 
som stod i kjellaren då vi tok over garden.



Gamle ting har sjel og fortel ei historie.



 

onsdag 18. mai 2016

Status lamming

No er vi i mål med lamminga for i år. Vi har venta lenge på at den siste skulle lamme, men no ser det ut til at nr. 30 er tom.
23 nydeleg gamalnorske spælsaulam er komne mellom 11.april og 1.mai.
Alle fødslane har vore problemfrie, dvs alle er komne rett veg.
Ei søye fekk jurbetennelse i det eine juret etter tvillingfødsel. Sidan vi ikkje fekk tømd det fordi det var tett, vart det penselinkur i fire dagar og juret var ikkje til å redde. Eine lammet fekk tillegg, men etterkvart ville kåsa ikkje ha meir. Vi oppdaga at ho stjal mjølk frå andre. Ei lita spekulert dame dette. 
Ei anna søye  fekk tvillingar, 
men eine lammet var underutvikla og dødt.
Søya som fekk firlingar med ti dagars mellomrom er ei utruleg omsorgfull mor. Tredjemann i søskjenflokken får flaske då mora ikkje har nok mat.












Vårens vakraste eventyr!
No er det eit år til neste lammeeventyr.